千の味刺身壽司專門店 (海福花園商場) (已結業)

太座鍾意去大圍街市買餸，話夠新鮮價錢又平，今日又揸車車佢去，點知度度都冇位泊，結果要去到對面街嘅海福商場先有位，諗住行返過去街市，發現呢度都好多小店，見到呢間壽司，太座話不如試吓！“燒汁牛肉定食”燒汁味道適中，牛肉夠嫩滑，個仔食得好滋味！“二人刺身盛盒D”有三文魚、赤貝、油甘魚、帶子同松葉蟹腳，刺身夠新鮮，所以味道唔會差，呢個拼盤都可以試多幾款，另外仲點咗“北寄貝”同“特大赤蝦”刺身，太座至愛除咗希靈魚就係北寄貝，佢話呢度好出色，都係因為夠新鮮！壽司方面都好多款式，較少見到“左口魚邊”，口感煙煙韌韌，得意！“辣味三文魚軍艦”都幾惹味，“軟殼蟹反卷”軟殼蟹炸得脆卜卜，配埋飯團軟熟，好味道！“吉列炸蠔”係我至愛，最緊要趁熱食，呢度隻蠔都幾好口感，炸得唔會太油！總括嚟講唔錯，有得泊車咁方便，下次又可以再嚟幫襯！