深宵食堂 (已結業)

位於尖尖樓上嘅日式居酒屋，坐位有室外室內，室外係個露台仔咁，都幾有feel，不過怕熱嘅我都係坐番入室內好了～食物種類唔算多，揀幾樣試下先。先上芝士蝦丸同芝麻雞翼，一股熱氣，好似炸得好好食咁，蝦肉都算彈牙，芝士濃味過蝦味，鐘意芝士嘅朋友可能會鐘意。雞翼聞起上來好香，肉質軟滑，熱辣辣都幾好食。芝士蟹肉玉子燒，寫上店名「深宵」二字，相機食先～之後店員就會切開一份份，芝士即刻流出來，蟹肉唔算太多，蛋味不太重，但玉子質地幾滑。燒白鱔一上枱已經好香，睇起上來好厚肉，食落肉質彈牙，燒得甘香，味道唔錯，食到魚鮮味，留下深刻印象。香草黑豚肉飯，香草味好重，聞係好香但食落口就覺得有少少過重，豚肉燒得好香，質感略嫌腍左啲，似食緊漢堡扒。食物整體都ok，環境幾清靜，好啱同朋友慢慢坐傾下計仔。