塚田農場 (已結業)

-🔸美人鍋套餐 $168🔸安格斯牛小排定食 $148-收工同男朋友拍拖行吓APM，見依間日式裝修嘅餐廳，主打美人鍋同燒肉，就一於試試啦～我當然係揀美人鍋啦，配骨膠原湯補一補，上枱見到湯底成個啫喱咁超過癮。跟餐有菜有肉有主食，一人邊爐都好豐盛啊！肉類揀咗明太子芝士免治肉同肥牛。蔬菜盛合仲好色彩繽紛，夠晒健康。主食揀咗日本雞蛋雜炊，貪佢有多隻蛋，可以沾肥牛食或者食到最後，煮個湯飯食都好正！男朋友食安格斯牛小排，都有成十幾片厚切，油花均勻，食落入口即溶有牛嘅油香。鐵板仲有坑紋，手殘都輕鬆燒到靚牛肉。套餐有前菜、漬物、味噌湯同白飯，好滿足。