BriKetenia (已結業)

太太2日前生日，今晚補食生日飯，之前已經嚟食過，記得d食物質素好好，所以今晚再嚟。頭盤叫咗鵝肝焦糖燉蛋, 係冷盤，配多士，可能已經好肚餓，所以覺得好好味。另一頭盤係白酒煮青口，青口唔係好大粒，但份量以頭盤嚟講都唔算少，青口好新鮮，食落肉質鮮嫩，白酒汁好入味。我地覺得頭盤已經好大享受。主菜叫咗慢煮牛肋條日式燒汁，刀切落去已經知肉質好嫩，除咗食材質素好，個汁亦煮得好，襯托出牛味更濃郁，我同太太都話冇得彈。另一個主菜係煎鯛魚配帶子，兩件魚柳本身雖然唔算好正，但廚師烹調功夫到家，將魚皮煎得好脆，調味又好好，完全將件魚柳提升咗，食落都好正。跟住食埋個甜品，法式蘋果批配雪芭。我覺得呢間係觀塘區質素較高嘅西餐廳。下次將會再去嘆下佢地嘅靚牛扒。