有人話食潮州菜比較貴，但係我覺得物超所值。因為潮州菜食的係手工菜+ 新鮮食材，平時自己好難
係屋企做到，因為時間成本同埋相應食材都好難搵到。
百樂小館裝潢好有和風格調。裡面仲有BB凳，方便有小朋友的家庭。👍🏼👍🏼👍🏼
食飯前遞上功夫茶，仲有酸菜同花生，零舍開胃。
招牌滷水拼盤，有鵝片墨魚片豬腩片雞蛋，滷水調得恰當好處，突出食材嘅味道。
蘿蔔灌漿，係一件巧手之作。首先用高湯浸啲蘿蔔，跟住拎去炸。蘿蔔一粒粒 ，外脆內軟，又點少得潮汕一帶嘅吉仔汁呢！正！
老黃瓜粟米煲唐排，正宗廣東老火湯，消暑清熱。
欖菜肉碎四季豆，新鮮的四季豆炒欖菜肉碎，絕配。
呢個唔知係唔係泰菜明爐魚的祖宗，元朗烏頭在加熱的高湯浸熟，配合蔥芹菜，等等配料，相當野味。
和牛肉鬆濕炒飯，先起鍋炒蛋白，炒至粒狀，撈起。再大火炒牛肉同飯，加入沙鍋以高湯煨熟。簡單嘅炒飯講求係快速準繩的廚藝。好好食。
返沙芋條又係經驗之作。將芋頭炸至鬆軟再沾裹上糖漿翻炒，要炸到外脆內軟而不糊，好講究廚師嘅功夫。呢度先食到正宗的味道。
最後點左兩碗甜品完美作結，一飽口福。
