俺流塩らーめん (V City) (已結業)

上星期見到『飲食男女』封面介紹咗呢碗『青檸雞肉冷拉麵』，所以膽粗粗帶埋同事嚟試下！一般食冷麵只會係用凍湯做 base，呢個冷拉麵嘅凍湯入面竟然仲有冰塊，真係夠晒透心涼呀！店員仲有介紹返，冰塊其實係用鹽湯雪凍佢，就算溶咗都唔洗怕湯底會變淡。無聊數數有9片青檸咁多架，真係幾足料！而且餐廳有提供小木匙，想要幾酸都可以由自己控制。我應該唔小心篤到啲青檸皮，所以最後有少少澀澀地嘅感覺。上面果兩大塊雞扒只係一般，有啲淡口。另外呢度有一點幾好嘅係佢哋會提供凍滾水一小杯，唔會迫你點嘢飲，但係加汽水都好似只係加 $8，尚算合理。不過我哋呢班知慳識儉嘅同事就選擇咗唔加嘢飲，寧願加小食開心 share，於是叫咗同系列嘅『青檸味噌炸雞』，同埋『明太子芝士燒餃子』。本小姐超鍾意個燒餃子，雖然唔係好食到明太子嘅味道，但佢有厚厚嘅芝士，邪惡芝士拉絲就係佢，仲拉到 20cm 咁高！至於個炸雞呢，都係值得試嘅！炸雞本身已經好香口，加埋味噌調味更惹味，而青檸汁同樣係自己落，咁就唔駛驚會太酸喇！