南小館 (已結業)

南小館我去睇戲嘅時候，有時都會去南小館食過快飯，再飛上去睇戲。呢度有樣好，就係上菜上得好快，真係好快，差唔多5分鐘內點都見到一樣，所以要食快飯，呢度係唔錯嘅選擇，又唔使等位。我幾鍾意南小館嘅前菜同甜品，佢個甜品套餐$58，其實都幾抵食，可惜是晚要快，真係食唔切，唯有下次。呢晚叫咗，涼拌彩絲，八寶拌麵，燒賣，桂花糕。涼拌彩絲 同 桂花糕，之前都食過，都係我鍾意食嘅，鍾意食豆乾，木耳，再加上佢嘅酸辣汁，真係幾好食。桂花糕就鍾意佢煙煙靭靭，加上中間個少少桂花糖，唔會太甜，真係可以一個人食晒3件，可能食多一碟都仲得。八寶拌麵，味道唔錯，唔算太鹹，但係有啲油咗少少，失望嘅係料唔算好多，得兩粒豆乾，兩粒豬肉，如果啲料細粒啲，多啲，就好喇。個燒賣都係第一次食，原來入面係包咗糯米，幾得意嘅，仲有少少鹹肉係入面，食落都幾好味。其實，我最鍾意都係食炒年糕，同埋佢果個香菇包，可惜已經無咗香菇包啦...希望佢會再出個啦。