粗店燒烤 (已結業)

旺角串燒舖粗店燒烤，位置處於香港嘅中心點——旺角，都近旺角東火車站，算幾方便。店舖裝修簡單，每張枱上面都有掛住一個白色嘅物體，初時只係以為係裝飾，仔細一睇先發現原來係紙巾，覺得呢個設計好符合經濟效益，又慳地方又方便。呢間舖頭主打串燒，嘢飲嘅選擇比較少，我就揀咗包紙包檸檬茶，朋友仔就揀咗啤酒。燒原隻魷魚，魷魚質感軟得嚟彈牙，啱啱好，調味適中，味道唔錯。雙重芝士撈一丁，邪惡之選，芝士味香濃，不過要食就要快，如果唔係鯨住咗就冇咁好食。燒大扇貝，扇貝都新鮮，調味搭配粉絲整體感覺唔錯，不過就唔算好大隻。牛肉串、五花肉、翠玉瓜、燒菠蘿，可能因為我唔係食肉瘦，我比較鍾意翠玉瓜，清清地但有幾Juicy，啱我口味。秋刀魚，燒得比較乾身。錫紙豆腐，普普通通。