鼎泰豐﹝黃埔美食坊﹞ (已結業)

香港人習慣都係貪新忘舊。興嗰陣就鍾唔鍾意都會走去試，慌死蝕底，到唔興嗰陣就…鼎泰豐，想當年開店何其巴閉，去食唔夠人都唔俾入。到咗近年，莫講話唔使等位，入到去十分闊落，坐得好舒服。對於怕同啲趁熱鬧嘅人逼嘅我，真係絕佳。尋日同朋友仔點幾鐘嚟食，星期日午飯時間一樣唔使等位，入面得四份三滿。兩個人舒舒服服食個brunch，叫咗五粒蟹粉小籠包、一碗排骨湯麵、一碟蒜泥白肉。小籠包依然好味，層皮唔太厚，入面又夠湯。蒜泥白肉啲粉皮好爽，個醬好濃味。個麵啲湯就略淡。食完想食甜嘢，於是叫咗五粒豆沙小籠包，不過食落都係覺得茶樓啲豆沙水晶包好食啲，因為小籠包打摺個位比較硬。啲枱擺得算開，環境舒適，服務態度好好。放假嚟呢度食，好過去同人逼餐懵排個幾兩個鐘食件壽司。