買左個鮑魚雞粥同泡菜牛柳粥，老闆強烈推薦我試個煎餃同煎蝦餅，話即叫即煎，蝦餅又有啲墨魚滑同粟米咁樣，就同屋企人買多兩個小食，等左差唔多十分鐘先搞掂，原來啲粥係生滾粥，都值得既。
（有隻鲍魚喔）
重點黎啦！🍴
我就食鮑魚雞粥，個粥食落口好濃既菇味，基本上成個粥底都係，十分喜歡！如果唔鐘意菇味可能就要試其他粥，入面仲有幾舊冬菇同兩三舊雞肉，都算幾足料！🐓🐓
屋企人就食泡菜牛柳粥，貪得意試下因為係辣粥黎，試左幾啖有驚喜！有啲泡菜碎係入面，真係好辣好惹味，估唔到辣味既粥又幾夾，但真係好辣，而且屋企人話有好多舊牛，啲牛柳粒都係辣味架🐃
啲小食都真係幾唔錯，拎到翻屋企啲餃仲係脆既，加埋啲黑醋做調味，外脆内軟大大隻。個蝦餅有好多粟米粒又好甜😍都食到啲蝦肉係入面，雖然唔係舊舊有，都ok啦，果然無介紹錯😂
小總結: 其實佢地堂食得一張枱，賣既粥款式都偏少，得個10款粥，但都係比較新潮，雖然份量唔係好多但食落好足料，食完唔會好頸渴，小食仲有啲特別啲既蓮藕餅芋頭餅，最緊要係價錢公道！ 下次會再去試埋其他粥，提提你地有得打電話去叫定先，咁就唔洗好似我咁熱住等幾個字🤦🏼♀
