茶木‧台式休閒餐廳 (已結業)

由於呢個好朋友喺佢生日正日嗰日唔喺香港，所以我們就特意提早幾日同佢去旺角朗豪坊嘅「茶木·台式休閒餐廳」食午餐慶祝生日！我們叫咗蚵嗲肉碎泡飯嘅蚵仔好鮮甜肥美，雖然份量唔算太多，但湯底嘅味道都幾鮮，而且有香濃嘅芫茜香味！Teawood紅燒牛肉麵係我們每次嚟都必叫㗎，因牛肉係𦟌腩嘅位置，所以肉質極之鬆軟腍身，中間嘅筋非常軟滑，仲要係好厚身，所以口感好豐富，而且牛肉味亦相當香濃，所以湯底嘅味道超鮮味濃郁，而麵質亦好煙煙韌韌，真係超正呀！阿嫲元貝金菇蔥油麵係用好多炸得色澤好金黃，而且好乾身嘅金菇舖面，而底層就係用蔥油嚟撈嘅麵，麵質好煙韌彈牙，而且好芳香惹味！由於無另外買蛋糕，所以我們就叫咗草莓香草蜜糖磚塊嚟充當著生日蛋糕，磚塊即係用幾塊厚多士炸到好金黃酥脆，再將中間切成粒粒磚塊，之後再沾埋啲冰凍嘅雪糕同忌廉一齊食，真係好正呀！