韓珍 (帝國中心) (已結業)

呢間韓式燒肉之前已經食過，覺得食物高質、服務又好，最緊要係環境唔錯。今次黎有唔同套餐，叫左牛豬兩人套餐，有蜂窩五花肉、豬肩肉，調味特級牛肋骨。可選甜南瓜沙律或牛油果生果沙律；及泡菜豬肉湯或牛胸肉大醬湯，及雪糕，非常豐富。一開始已經有多款配菜俾你，有泡菜、翠玉瓜、蘿蔔絲、薯仔及黃瓜等等。甜南瓜沙律，南瓜整到一個個波狀，幾靚。沙律菜新鮮，夾埋一齊食又唔會覺得太「濟」。泡菜豬肉湯夠晒辣，呢個湯送飯一流！最正當然係主菜！我最鍾意食牛肋骨，夠晒大條，肉夠林，又夠入味。唔點醬汁都好好食，點左醬汁就更加昇華味道！牛肋骨係必食！五花肉都好正，燒到卜卜脆。好似食緊燒肉咁，而且豬肉又夠林，外脆內軟，好香口。豬肩肉好似豬扒咁，肉質都係幾好食，而且又夠大塊。包住生菜點醬汁好Juicy！最後跟餐仲有雪糕，真係大滿足！呢度嘅服務非常好，真係除咗食物好食，又食得開心！