九重鮮 (已結業)

屋企人個個都鍾意食海鮮、基本所有中式蒸海鮮都試過，今次選韓式海鮮店，只有紅磡及大坑分店，今次揀咗大坑分店試吓，六點鐘打電話去book七點半，去到都已經坐咗三至四枱客，有四個套餐可以選擇，但松葉蟹套餐沒有松葉蟹，所以選左另外一個都有蟹嘅套餐，我哋四個人，但只點了三個餐，因為知道實食唔晒，果然食到一半已經好飽，而且仲有個粥底，食幾碗粥都飽。海鮮要食鮮味，基本所有都新鮮，屋企人都食得滿意，當中海鮮配上蔬菜，例如番薯、南瓜、茄子等等，咁嘅食法不會覺得好悶、值得一讚，韓式當然亦都有配菜奉上、當中媽媽最喜歡吃kimchi , 因為老人家又唔係食得辣，味道恰到好處，食完仲可以叫侍應添加，老人家吃得好開心。今晚湯底揀咗人蔘雞湯，雞入邊塞滿糯米，美中不足唔夠人蔘味、咁雞當然會比較鞋少少，因為由開始煮到落尾，但整體粥底都唔錯、食唔晒之後侍應仲會問你攞唔攞走個粥底，爸爸媽媽梗係唔浪費所以都攞走咗。中銀卡有九折，買單大概＄1200多d。