小火焰韓式咖啡廳 (金山樓) (已結業)

難得入大圍食飯，想食韓國菜，見到呢間小火焰餐廳係觀塘好出名，而大圍都有分店，於是入去試吓。芝味炸雞半份($108): 雞肉非常嫩滑，而且炸得好香脆，平時唔食雞皮嘅我，都忍唔住食埋添呀！而且佢落左芝士粉+芝士醬，食落去成個口腔都充滿住芝士嘅香味，完全岩晒芝士腔嘅朋友嗌呢碟餸呀！泡菜肥牛炒粉絲($108): 粉絲質感黏得黎，又好彈牙，連埋泡菜一齊食嘅話，辣味嘅刺激感令我更加想食到幾多啖添呀！而且肥牛嘅鮮牛肉味，再撈埋韓式粉絲，亦好match! 不過辣味未必個個人都適合，食唔到辣嘅朋友要小心啦～韓式蟹籽卷蛋($98): 可能甚少食韓式卷蛋，蛋入面包住啲飯作為餡料，一開始以為好奇怪，但食落去感覺又好新奇，上面再加埋啲蟹籽，有少少脹爆嘅感覺，好有口感，令層次感大增！韓式煎雜菜蝦餅($88): 個餅底煎得金黃香脆，食落去有少少焦香味，但稍為油左少少🤏但好彩因為有雜菜去中和下油膩感，每塊餅都有1隻原隻鮮蝦，上面落左啲泡菜刺激味蕾，不過都係個句，食唔到辣嘅朋友就要小心下。