靠得住粥麵小館 (MOSTown新港城中心) (已結業)

新港城中心食嘢冇乜選擇，中午想清淡少少又入口濕濕地，唯有嚟咗靠得住。單點真係好貴，唔係好值呢個價，但有套餐選擇，加埋炒麵油菜之類，套餐價都OK。講返叫咗「心肝寶貝粥」，個名改到懶溫馨咁樣，聽到都令人毛管戙。仲以為係豬心加豬潤加帶子啦，見你改到個名咁型呀嘛，點知原來係冇豬心 ... 唓！餐牌細細個字寫住黃沙豬潤，結果呢？一啲都唔黃沙，仲要係薄切，好鬼孤寒，又煮得過咗龍咬落鞋鞋地。輪到碟炒麵，我明白佢用心良苦，用返最傳統最cheap嗰隻麵嚟炒，即係細細個去粥麵舖食，嗰啲好幼又乾嘅炒麵，感覺好懷舊囉！不過，值得一讚，同時係唯一今餐最好食嘅，就係隻糭，足料夠味好好食，所以食完先記得冇影相。留意番，間野成日拎住個米之蓮出嚟曬，其實只係灣仔總店咋，其他分店唔關事㗎！