極品煮意 鷄煲.烤魚.火煱 (已結業)

平時好少去到荃灣，見到有一間專食烤魚雞煲火鍋專門店餐廳，就同朋友兩個人去試吓，而且係一個價錢任食任飲的，唔使成日計住計住叫嘢食。逢星期五六日，九點半之後入座都係＄158一位，非常便宜呀。入到去環境都舒服，而且有好多卡位，另外位置都好寬闊，除咗雞煲之外，原來出面都有好多自助食物同埋飲品隨便拎，非常方便，自助食物包括「炸雞翼」、「滷水雞腳」、「炸薯餅」、「豉椒炒蜆」等等。另外仲有啲開胃前菜，分別係「涼拌海帶絲」同埋「手拍青瓜」。我最鍾意係「滷水雞腳」，煲得好「林」，而且好入味，正！之後我哋叫咗一個「秘製極品雞煲」，我哋叫咗最少辣。雞嘅份量都比較多，而且啲雞非常入味，仲有少少麻辣嘅感覺，好刺激啊。食完個雞煲，梗係要叫啲任點任食嘅食物再填下肚，任食嘅食物有多款選擇，不過如果想叫海鮮就要另外收費，價錢都非常抵，值得叫！套餐每人送一隻海中蝦，隻蝦仲識跳添，非常生猛，海中蝦放入鍋入面唔使幾分鐘就可以食得，肉質好爽，而且好有新鮮嘅海鮮味道，必食！之後當然唔少得叫我至愛嘅「美國肥牛」、「雲吞」、「金菇」、「羊肉片」、「手打鯪魚滑」、「鯇魚腩」等。我最鍾意佢嘅「羊肉片」，食落去唔騷，而且啲肉好軟林林，好正