Lagom Kaffe (已結業)

今日去咗牛頭角嘅分店返工,同事帶咗我去一間無論食物同環境都非常好嘅餐廳，所以好值得喺度推介一下，地址就係牛頭角觀塘道348號國際貿易中心1樓101號舖Lagom Kaffe 去到鋪面職員非常有禮貌, 見到餐廳人客都好多，因為空間好大完全唔會覺得逼，裝修雖然簡約，但係俾人感覺好舒服好整潔。係繁忙中食返一個舒適嘅午餐，完全有充電嘅感覺。All day breakfast 128元 食物材料非常豐富，賣相都好吸引，薯餅炸到金黃香脆，外脆內軟，一啲都唔會油膩，太陽蛋上面配上少少香料，令到味道更加有層次，蘑菇煎到好香，辣肉腸好惹味，肉汁豐富，配埋清新嘅沙律菜，簡直就係享受。燻鮭魚沙律 88 元三文魚帶點鹹香，加上三文魚保留到魚肉鮮味，經過煙燻帶一點煙香，三文魚肉非常有彈性，色澤好鮮艷，口感肥美豐富，香味停留口中。沙律爽口清甜，最欣賞就係洋蔥，洋蔥做到爽甜多汁，味道清新，因為食洋蔥好有益，所以好欣賞呢個沙律。奶油南瓜蟹肉意粉，南瓜好香甜，意粉上面鋪滿蟹肉，每食一口意粉都沾到蟹肉，整個味道層次豐富，鮮甜嘅蟹肉味帶一點清新嘅南瓜味，非常好食，意粉煮到啱啱好，軟硬度適中。下次去牛頭角返工，一定會嚟呢度食