好適合週末黎輕鬆一下
非常可惜 結論而言我係錯既。
我地約早上11:40 到達餐廳, 當時餐廳只有約3-4枱客人
餐廳係用掃碼落單既方式, 個人好鍾意呢個方式, 簡單易用又清晰
今日一場黎到係想試威靈頓牛柳
我地總共點左威靈頓牛柳、雞肉漢堡、一客蘋果批、一杯水果沙冰同一杯咖啡
呢度食物價格係中間水平, 每度菜200元內, 飲品每款約4-50元
呢一餐共花500元。
呢一杯咖啡黎到既時間係11:50, 呢杯咖啡非常好飲
焦糖甜度適中, 配上咖啡香味, 四十幾蚊黎講係超值享受
威靈頓牛柳既上菜時間係12:10, 味道非常好食, 坦白講即使係中環比貴一倍, 都食唔到呢個味道
牛柳生熟程度恰到好處, 肉汁非常多, 酥皮同裡面既鵝肝醬&蘑菇泥亦非常好食
以200元以內既價格黎講, 呢個係100分既菜式。
雞肉漢堡並未有拍照, 但亦做得非常出色, 雞肉漢堡肉質軟棉棉, 並唔似其他餐廳咁煮到硬晒
甜味亦適中, 唔會太咸。
係我同老婆享受美食既時候, 時間黎到12:15, 突然間女店員行埋黎「催枱」, 表示我地已接近夠鐘, 請盡快進食!
我同老婆嚇一跳, 岩岩先上菜, 我地坐低都無幾耐, 夠鐘???
之後女店員行去隔離枱催隔離枱夠鐘, 隔離枱果兩位女士同樣嚇一跳
呢兩位女士比我遲10分鐘先坐低, 咁快又夠鐘???
坦白講, 進食心情已到低點, 食物幾咁好食都無用, 比人催住快D食又點樣享受?
係5分鐘後即12:20, 另一位店員又行埋黎再次催枱, 叫我地快D還枱, 我叫店員望下
我地兩碟主菜先食到一半, 點樣還枱??
之後一位男經理 (不肯定是否經理)過黎問我有咩問題還唔到枱, 我同男經理表示「入座時完全無提及有1小時限制」
男經理表示「無可能」, 一定有講。咁似乎我同老婆 加上隔離枱既客人耳仔都有問題
無人聽到呢件事! 男經理表示我令佢好難做, 影響其他客人入座, 問題係無人等緊位, 餐廳得4-5成滿, 我影響緊邊位客人?
隔離兩位女士急急腳飲埋野飲, 我見佢地主菜都未食完
忿忿不平離開, 佢地好一個週末, 咁樣就破壞左心情
我連甜品都未食, 我當然唔會走住, 加上都未夠1個鐘.......我11:40 先入座, 12:15 開始催我走係咩玩法?
蘋果批黎到既時候, 其實我已經無乜心機食, 都係普通貨色
表面既雪糕上菜時已熔得比較利害, 食唔出「凍雪糕」配「熱批」既冰火口感
呢一點較為可惜, 但餅底係唔錯既, 蘋果肉份量亦足夠
一男一女既店員係左右兩面望住我進食, 好似「監督」住我既進食速度
到底我做錯左乜野? 我欠左佢? 我搶左佢張枱? 驚我偷佢餐具??
係我食完最後一啖蘋果批果一刻, 枱上既碟&餐具迅速被收走, 同時提我埋單可以自己去門口埋
呢一刻既時間係12:35
OK, 我錯, 我阻住你地做生意
我一起身, 回望餐廳內, 只得一半既枱有客人
我行出去比錢, 望向餐廳外, 完全無人等位
到底點解咁急要客人離開??
500蚊一餐, 唔通餐廳歸類自己係快餐?
如果係快餐, 上菜可唔可以快少少? 係唔係應該落單後10分鐘內上齊菜?
我認為呢個價格, 30分鐘就開始催枱, 食呢餐飯係享受上既性價比實在有D太低
要用食麥記既心態黎食? 但收費係500元。但麥記都唔會趕人走。
非常差既體驗到此結束
疫情剛過, 飲食業迎來生機, 餐廳遇上我呢類進食慢既客人, 實在黑仔
我亦應好好訓練自己5分鐘完食, 以免影響餐廳客如輪轉
