廉記冰室 (春園街) (已結業)

星期六又出到黎灣仔做野，搞掂後黎左利東街行下，順便食埋野啦。到左隔離街嘅冰室食晚餐，地方大乾淨又光猛，感覺唔錯。店內有兩層高，裝修幾正。廉而有信店員先送上水，亦示意餐牌在枱上，食物選擇都算幾多，最後決定點一份晚餐，一份焗飯。熱奶茶＆凍檸茶（+$3）餐茶熱飲不用加錢，凍飲就加3蚊，一般價位啦。奶茶幾香滑，檸茶茶夠濃，兩杯都ok。是日餐湯係南瓜湯，好creamy好濃南瓜味，微微甜好飲。燒羊扒黑椒汁（$80）羊扒有兩塊，燒得香口juicy，有羊味又不太酥。黑椒汁微辣幾好下飯，整體份量也算多，正常人都夠飽。白汁鮮菌焗海皇飯（$68）面層加了大量芝士十分香口，飯炒底幾正喎，海鮮有魷魚同蜆肉，不過餐牌上寫的鮮菌就欠奉，白汁調味略甜，整體只可說是合格。晚餐會有甜品送，不過示意後都沒有送上，就懶得追問了。