皇后泰國廚房 (已結業)

同同事第一次嚟呢度食lunch，menu上面有六款，我哋六個人，啱啱好一人叫一款(笑)。雖然午餐98蚊好似有啲貴，但係除咗主菜之外仲有自助餐區，有小食(炸魚餅、炒粉絲、煎蛋青菜沙律)，湯同埋甜品，仲包飲品，加埋個無敵靚景...其實呢個價錢喺尖沙咀算性價比幾高！自己就點咗個泰式濕炒雞河，可能因為有半自助餐嘅關係，所以佢主菜嘅份量唔算大， 好似喺泰國嗰邊食嘢嘅份量咁...不過佢個味係好正宗，河粉炒得好有鑊氣，啲汁多又唔會偏鹹，河粉好滑，雞肉嘅份量幾多，而且煮得唔嚡口，幾好食！雖然佢嘅主菜好食，不過我覺得更好食嘅反而係自助餐區裏邊嘅食物，泰式魚餅炸得好香口，而且充滿魚肉味！炒粉絲有少少辣， 加埋肉碎我覺得個口感好好，好彈牙！個湯正常，清清地味道冇話太突出...而我最鍾意係佢嘅甜品，椰汁西米露！佢除咗有好香嘅 椰汁香味之外，佢嘅西米露係好煙韌彈口，唔似得一般街邊嘅糖水舖咁腍！而佢送嘅嗰杯飲品係蜂蜜綠茶，個味同泰國嗰邊飲嘅好似，因為甜味係偏重。整體嚟講我覺得成餐 飯同泰國食到嘅泰國菜嘅味好相似，感覺好正宗！呢間性價比幾高嘅餐廳距離我返工嘅地方唔算遠，下次會再同同事嚟！