煮打菜打冷小菜館 (已結業)

今日難得一家人食飯，我叫媽咪唔好煮喇，見屋企樓下間中菜館，講咗咁耐都未試過，就一齊落去試試佢先。南乳齋煲，呢度餸係婆婆嘅至愛，幾乎每一次同佢食飯都嗌，可能係因為老人家特別鍾意陣南乳味啩，不過食食下嗰陣味道連我都鍾意埋，煲入面嘅支竹，冬菇，筍，茄子，白菜，紅蘿蔔粒同埋最重要嘅粉絲全部都充滿住南乳味，零舍好餸飯。大漠風沙金錢鱔，金錢鱔走油後香酥撲鼻，咬一啖脆到不得了，酥脆入面既鱔片亦都相當有份量，絕對唔會話淨係得陣脆漿可以食，伴隨著上面嘅炸蒜頭，香蔥，芝麻同埋紅椒粒一齊食，份外惹味。魚湯海味浸勝瓜，一上枱先試一啖個魚湯，嘩，真係好鮮味啊，一飲就知道無落到味精，嗰陣魚嘅鮮味，加埋湯入面嘅蝦乾同埋銀魚仔，同個勝瓜好夾。糯米釀雞翼，呢個糯米釀雞翼認真過癮，好似好少地方有得嗌，將糯米炒香之後，釀入拆咗骨嘅雞翼入面，再將雞翼炸到脆卜卜，咬開脆卜卜嘅外皮之後就傳嚟香噴噴糯米飯嘅香味，最過癮係拆咗骨，啖啖肉吖嘛。臨尾仲送多個腐竹糖水，個糖水夠哂熱得嚟又唔會太甜，正。