博日本料理 (已結業)

當日係星期六，大約下晝兩點，我地一行人大概等左15mins就有位坐，唔算等得好耐。入到去個裝修俾到我嘅感覺係好光猛、好乾淨，從餐廳嘅擺設睇得出老閣係對日本文化有深入了解嘅人，個環境俾到我嘅感覺係細緻同舒適嘅。我地都叫一樣嘅lunch set，全名就真係記唔到，不過個餐嘅重點係壽司十貫，印象中其他嘅餐好似有魚生飯、湯烏冬等等作為main course。成個set包左前菜、茶碗蒸、main、冷/熱蕎麥麵同餐湯。前菜係醃菜同沙律。醃菜係三種日本醃菜，分別係醃牛榜、醃蒜同埋醃蘿蔔。雖然我個人覺得如果就咁食，無飯配嘅話係有d咸，但係三種醃菜味道都十分獨特出色，尤其醃蒜簡直鶴立雞群，唔單止去除左蒜頭嘅辛辣，醃蒜嘅清爽口感更帶俾人一種食緊馬蹄嘅錯覺，十分有趣。侍應見我地食曬d前菜，就上茶碗蒸同麵豉湯。到我地食到咁上下時，師傅就整好左個壽司十貫。serve到上枱時，成個感覺好精緻同埋d魚生嘅色澤好光亮，一睇就知d食材新鮮。我地對每件壽司嘅味道都十分滿意，不約而同認為呢餐係物有所值。到最後侍應上埋冷蕎麥麵為整餐飯作結。當日我地人均消費大約$200。