たまご園 (朗豪坊) (已結業)

同老公行行下朗豪坊留意到呢間以雞蛋為主題嘅餐廳，覺得幾得意就入去試下。食物款式好多，點咗一個lunch set，所有主菜都奉送麵豉湯及沙律，非常豐富！和牛漢堡($128)揀咗呢個和牛漢堡餐，選用宮崎和牛漢堡，脂味芳香，肉味香濃。宮崎和牛好出名，平時超市買一塊漢堡扒都唔平，呢個價錢喺餐廳真係超值！太陽蛋亦煎得非常漂亮，賣相吸引！好耐冇食過炸物，就點咗南蠻炸雞($58)試下，點知好有驚喜！我覺得呢個來到真係必點，好難得喺香港都可以食到有接近日本水準嘅南蠻炸雞！呢度嘅成品確係唔錯，炸皮好薄，入面肉質嫩滑多汁，蘸上他他醬，惹味非常。我哋大概2:00去食lunch，食到2:30啱啱好可以叫下午茶！ Tea set $68 ，可以有兩塊梳乎厘班戟+飲品，班戟口味可以揀原味、焦糖香桃、香蕉朱古力、士多啤梨、菠蘿黑糖珍珠，非常超值！ 我揀咗原味，口感充滿空氣感，蛋香如果再濃一點就更好啦！反而士多啤梨奶昔($48)好有驚喜！士多啤梨味道香甜濃郁，加入生雞蛋，口感更滑。