落單後因為雞翼係即叫即整熱辣辣，大概等5-10分鐘就可以拎了。而店舖亦有少量位置可以坐低食，甚至無位都可以立食嘅！
店員有提供埋手套，方便直接無儀態咁用手食雞翼！不過雞翼真係太熱，直接用手拎都會辣親，都係攤一陣先會好啲，咁就惟有食啲薯條先！但原來薯條一樣係咁熱辣辣，而家佢嘅咸蛋黃醬係一啲都唔孤寒！每條薯條都沾滿流沙嘅口感，滿足度十足！
雞翼方面係正常發揮，雞翼炸得香脆，但仍然保留肉質嫩滑，配上甜甜玫瑰蜜嘅味道，真係食到lam lam脷，好彩有手套提供，唔係就食到成手痴淋淋。而和風甜山葵就比較普通，因為都係撈咗個醬就比客人自己點，而個醬都係山葵溝蛋黃醬，就略嫌無驚喜，只恨自己揀錯款！
但整體黎講都係十分之出色，啱晒鍾意食雞翼嘅朋友！
