Wingman (已結業)

作為雞翼控嘅我竟然第一次食呢間專食雞翼嘅餐廳，呢度最出名係雞翼放題，不過今日唔算好肚餓，所以就叫單點。呢度真係有各式各樣味道嘅雞翼，最特別嘅係啲雞翼有分乾身同濕身。我哋分別叫咗一款乾身、一款濕身同一款特製味道嘅雞翼，每一款有6隻。乾身我哋就叫咗巴馬臣芝士蒜蓉味，雞翼新鮮炸出嚟，個皮好脆，而入面啲雞肉仍然保持多汁嫩滑，芝士碎刨成絲狀，份量好多，加埋蒜蓉嘅香濃味，食落去香氣四溢，超級棒！濕身款我哋就叫黑芝麻海鮮蜂蜜味，微微既XO海鮮味加埋蜂蜜嘅甜味，仲有黑芝麻既香，真係食唔停口。雖然係濕身款，但雞翼個皮仍然好香脆！至於特製味道，我哋就叫咗自家製咸蛋黃，好推介，蛋黃嘅鹹香加埋雞翼嘅脆皮，香噴噴！食完18隻之後，我哋覺得未夠喉，所以又再叫多wingman水牛城醬，比傳統既水牛城更加香辣惹味，辣得好過癮，雞肉同樣好juicy！除咗雞翼之外，我哋仲叫左黑松露薯條，新鮮熱辣辣，配埋個黑松露醬，真係最佳小食！