寶寶雞煲 (已搬遷) 新店位置

雞煲店打邊爐@太子一心嚟食雞煲，點知海鮮火鍋 $198/位而且無加一，結果就轉咗打邊爐 😂 如果有 book 位，可以講定要粥底火鍋𠻹～首先有個環球海鮮盤，有八款唔同嘅海鮮，豐富到爆！海鮮籃有龍躉、魷魚、生蠔、帶子、蜆、蚌、膏蟹仔同蝦。侍應仲好細心咁一早擺定兩個桶仔，俾我哋掉殻。啲海鮮全部大大隻，size 唔細㗎喎。真係好新鮮好鮮甜，樣樣都好掂 😍大蝦好生猛，肉質爽彈 👍🏻 原本見抵食先揀呢個餐，無諗過呢個價錢有咁好質素嘅海鮮，超值！海鮮之後套餐包咗自選八款火鍋配料，各種肉類、手打丸、餃同菜等等，選擇都唔少。美國牛肉帶點脂肪紋理，食落柔軟唔乾柴。手切鮮牛肉切得厚啲，口感強烈啲。味道亦濃味啲，牛肉味重啲。日本黑豚肉都好好食，無普通豬肉嗰啲肉膻味。食落係滑嘅唔嚡～自製墨魚丸使唔使咁大粒啊？自製嘅果然彈牙得多 😋魚皮餃個皮幾薄，肉餡包到脹脹～炸魚皮脆到無人有，調味適中唔會過鹹，俾朋友送啤酒一流。最尾兩樣就點咗啲蔬菜、菌類，食完肉食翻啲菜就啱哂。唔飲啤酒嘅朋友就叫咗渣洛神花茶，酸酸甜甜又清涼，一渣都好夠飲。