尚上下夏2.8 - 養生雞煲火鍋x冰室 (已結業)

3月係好月份，因為係我同閨蜜嘅生日月，每年我哋都會一齊慶生，今年我哋就揀咗拋夫棄女，齊齊去食餐飽吹陣水。揀呢到係因為之前去過尖沙咀分店覺得好食，知道灣仔開分店就即刻嚟朝聖！門口好型格好易認到。為咗唔洗慢慢諗食乜，就揀咗《必食2人餐》，有雞煲，又有得打邊爐，真係一次過滿足哂兩個願望。我哋先食雞煲 (半隻)，加咗$20換煲，如果唔加錢換煲，就打完邊爐，將個雞煲倒埋落啲湯到再食。雞煲好正，因為可以揀雞髀肉，出面啲雞煲通常都有骨，最重要係可以揀走辣、bb辣、少辣⋯我哋揀咗bb辣，因為覺得雞煲都係有少少辣味先好食！食完雞煲就直落打邊爐，套餐包咗揀《特色湯底》，我哋就揀咗龍蝦湯底，未食前梗係飲返碗龍蝦湯先啦！打邊爐點少得肉，我哋就梗係食牛啦！揀咗《極品安格斯》，雪花分布好靚，入口又唔un，正呀。仲有店推薦《招牌手打四寶丸》，有墨魚丸、雞丸、蝦丸、豬肉丸，手打丸真係好好味。另外，打邊爐必備《響鈴》，浸3秒就剛剛好。海鮮可以揀蝦/鮑魚，我哋就揀咗鮑魚。打邊爐食啲菜係可以減少罪惡感。最後烏冬埋尾好滿足，以為食唔落，點知食下食下又食得哂。店入面嘅裝修都好靚好舒服，今次同閨蜜食得好開心，下次會考慮兩家人再嚟