塚田農場 (已結業)

今日同男朋友一齊食呢間日本餐，餐廳環境真係好靚，光線充足，最緊要座位寬敞舒服，面對一望無際嘅維港景色，食咩都好味！我哋就點咗美人滋鍋御膳，有啲似火鍋，但係好特別嘅係嗰啲肉肉都係掛住喺盤上，擺拍超靚！鮮甜嘅湯頭真係令我哋一口接一口，非常入味好飲，飲得出湯頭已經熬咗好耐，嗰啲精華都已經熬咗出嚟，飲落去成個身體暖笠笠。男朋友唔係經常飲湯嘅都將湯飲得一滴不剩！肉肉亦好嫩滑，和牛紋理超靚，油脂分布均勻，睇起嚟就知係高品質嘅牛肉！將牛肉放入湯底度涮個幾秒就可以食，口感鮮嫩多汁！豚肉十分新鮮，最鍾意就係一點腥味都冇嘅豬肉，肉質亦都好嫩滑可口，唔會膩！呢個日式火鍋仲可以配白飯 / 拉麵 / 烏冬，我哋鍾意食飯嘅就點咗白飯配住一齊食，濃郁嘅雞湯味道配住白飯就已經好好味！我同男朋友都食得心滿意足！正啊～