雞少去骨海南雞

营业中

休息中

作為喇沙海南雞忠粉，一有新喇沙雞開就會第一時間衝去試～ 今次就去咗炮台山呢間雞少招牌海南雞喇沙：呢度嘅海南雞用嘅係三黃雞，皮薄肉厚，仲要起哂骨，啖啖肉勁好味，佢哋嘅雞肉嫩滑，仲好有雞味，蘸埋佢哋嘅三色醬就更滋味。喇沙湯好香椰香味，但湯頭算係較稀嗰種，辣度較想像嘅辣，入面仲有好多嘅配料，好似有豆卜芽菜雞蛋生菜魚片等，加埋海南雞勁豐富。另外再叫咗個一人餐 ，有招牌海南雞 ，亦都可以轉滷水元蹄/碳燒豬頸肉，我哋呢次轉咗豬頸肉。個餐仲包咗一碗油飯、無味精住家湯 、雞湯白灼時菜、港式熱飲。豬頸肉好有驚喜！ 燒得啱啱好，唔會好乾身，有陣陣炭燒香味，蘸埋佢哋嘅秘製酸辣汁，惹味得嚟又開胃，仲可以中和豬頸肉嘅油膩感，而油飯嘅油香好濃，做到油而不膩。住家湯飲得出無落味精，用料亦都好足。用雞湯所煮嘅時菜多添一份雞味。如果都未夠仲可以加錢配一客小食，我哋加多一份泰式香茅魚餅。魚餅香茅味好香，同魚餅好夾，一客有四塊，配埋秘製醬汁一齊食就更好味。龍眼冬瓜茶：清潤解渴，味道清甜，好啱食完油膩嘅嘢飲。