新贊記點心皇

营业中

休息中

早排喺旺角街市買餸見到有新店開張，位置喺深圳街，有少少隱蔽，主打點心同蒸飯，今日買餸前同媽咪嚟嘆茶。點心選擇唔少，大致上同一般茶樓差唔多，仲有優惠價點心孖寶，而且只收六蚊位嘅茶錢，唔使加一，非常化算。除咗點心之外，仲有各式各樣嘅砵仔飯，我哋嘅座位對面有位老人家食緊豉汁蒸魚食得津津有味，非常吸引。牛肉腸非常足料，腸粉拉得非常薄，口感好滑溜。牛肉餡料非常多，而且牛肉味濃郁，配上芫荽同蔥末，食多兩件都唔覺得膩。鴛鴦燒賣就最適合二人世界，一次過滿足兩個願望，一邊係鮮蝦燒賣，另一邊係牛肉燒賣，兩款都好新鮮，各有千秋。棉花雞份量足，雞肉嫩滑鮮味，冬菇亦夠哂軟腍入味。豬皮非常厚，吸收哂湯汁嘅精華，口感亦好鬆軟。蒸飯份量唔細，肉餅比例亦算多，相當抵食。肉餅夠惹味，餸飯一流，但面頭嘅土魷粒就略嫌淡咗少少。西生菜份量好大，油份夠，入口新鮮爽脆。飲茶當然唔少得我最愛嘅薑汁千層糕，千層效果好平均，賣相唔錯。食落薑味夠香濃，而且甜度適中，口感煙韌有彈性。芒果布甸賣相撲素，但味道唔錯，芒果味夠重之餘仲加入新鮮芒果肉，真材實料。呢度嘅點心真係超抵食，兩個人食到捧住肚皮走都只係百幾蚊，平時上茶樓冇二百幾都唔使指擬落樓