CHOO CHOO (已結業)

Choo Choo喺長沙灣順寧道，由於附近係住宅，平日夜晚都幾僻靜，餐廳隔離係一間車行，比較唔顯眼。不過入到餐廳就係另一番景象，我哋入到去都差不多滿座。餐廳設計成一個火車車廂咁，側邊有四個大螢幕，裝潢成四個火車車窗咁，播緊嘅係移動中嘅景色，頭頂仲有行李架。餐牌就好似⋯⋯唔係⋯⋯係直頭係一本遊記嚟，貼咗啲車票、旅行照片，仲有啲唔同旅遊景點到此一遊嘅蓋章。【白酒.蜆 $138】啲蜆都幾多幾大粒，質感水潤，酒味濃度適中。配有脆多士同車厘茄，脆多士蘸白酒汁食，好好味～【古朴葉烤魚 $188】用香葉烤魚，上枱已經聞到陣陣香烤味。烤完魚肉嫩滑仍保持多汁。配上泰式香蔥芫茜醬，甜蜜中帶點香辣，食落更惹味又開胃。【西班牙伊比利亞黑毛豬梅扒(全橡級別)$178】用橡果作為飼料嘅靚豬，肉質粉嫩，脂肪豐富。一放入口即刻feel到滿口油香肉香，咬落肉汁亦相當豐富。配菜有迷你甘荀、燒粟米。非常高質嘅黑毛豬，可惜只有三件，有啲「唔夠喉」。餐廳裝潢有心思，食物質素高，絕對係一間值得支持嘅隱世小店。