大漁屋台 (已結業)

好少去德寶商場個一邊，通常黎得九龍灣呢一邊都係去德福廣場個頭食野。今次上網見到呢間餐廳既評語幾好，就決定去試下。我地就叫左個二人餐加d其他野食。首先係個前菜小食，中間橙色個個好過癮，應該係八爪魚黎但係個質感比八爪魚彈牙，食完d小食開完胃令到我更加肚餓。之後係刺身盛，有三文魚帶子油甘魚再加時令薄切，d刺身全部大大件啖啖肉，個個時令薄切應該就係鯛魚黎，配上一個特製酸酸地既醬汁，食落感覺好清爽，所有刺身都好新鮮。之後係海膽蔥花拖羅蓉卷，睇到個名都知佢豐富，拖羅蓉完美襯托海膽味道，一啖擺入口冇得輸。串燒有煙肉廣島蠔，黑豚肉，靖魚同埋翠玉瓜。我個人最中意黑豚肉串，夠惹味。個二人餐仲有個紙火鍋同埋烏冬，我自己就麻麻地個豆腐火鍋，嫌佢味道太清淡。我地之後再叫左關東煮同天婦羅。天婦羅炸粉份量岩岩好，皮薄餡靚。