一葉台灣料理

营业中

休息中

放工嚟到呢間台式餐廳，佢位置較隱蔽，要花小小心機去搵。店內地方都幾大，係左右兩邊嘅枱一字排開，座位都坐得舒服。 食物方面： 青瓜拼小木耳 份量好大碟，用上醋同蒜調味， 青瓜同木耳爽脆，係非常唔錯嘅開胃小菜。 一葉花雕雞 佢上枱係用個煲裝住嘅，大大煲份量好多！ 佢雞件數量都幾多，然後用咗極多配料一齊煮，有米血糕、冬菇、芹菜、薑蔥、紅蔥頭等等，所以聞落真係非常之香。 味道方面，佢食落有小小酒味，醬油分量剛好唔太鹹；雞肉大大件但食落好滑，而米血糕入味、咬落煙韌軟糯，冬菇、薑蔥等等香料煮到入晒味，食到好惹味！ 台式豬扒麻辣拌麵 麵質軟硬適中，麻辣肉醬好香嘅麻味但唔會好辣，我唔係好食得辣都接受到。 豬扒炸得剛好，炸皮薄而酥脆，而豬扒肉質軟淋但仍然有咬口，有肉汁，加埋上面輕輕用作調味嘅椒鹽真係好香口。 蝶兒飛飛 佢係荔枝乳酸梳打，唔太甜，有淡淡荔枝味，唔錯~ 整體而言，呢間小店水準都唔錯，而且價錢親民，店員服務態度親切。整個用餐體驗都令人滿意，會係回頭之選！