我叫咗個芒果千層班戟同沛公主義.沛公主義係一個芒果甜品拼盤,有芒果腸粉(佢哋叫雲中落日),法式芒果燉蛋,楊枝甘露同芒果糯米糍.
芒果千層班戟啲班戟皮同啲cream同啲芒果肉分咗做勁多層.但係同時間啲皮又整到勁鬆化.所以咬落去個口感勁豐富.
法式芒果燉蛋上面有軟熟嘅芒果肉,下面有微温嘅燉蛋.兩種味道,一甜一鹹.兩種口感,一個軟熟,一個有彈性.出嚟個效果都幾特別同唔錯.
楊枝甘露,個份量夠多.唔單止係碗嘢夠多,同時間裡面啲果肉嘅份量都夠多,所以每一羹都係充滿果肉同冰涼嘅湯汁.
雲中落日就稍為差啲.裡面啲果肉餡係幾正嘅,一大啖咬落去食口都係芒果肉味確係幾爽.但係外層因為係無味嘅可以整薄啲啲.
個芒果糯米糍都唔錯,個糯米外層夠煙韌,裡面啲果肉都特登整到小小液體狀咁,內層夠juicy.
