宮葉 パフェ (已結業)

今日同朋友係觀塘行街，雖然觀塘區有好多特色嘅工廈cafe，但係因為朋友表示已經行到好攰，所以就求其揾咗間地鋪食啦。呢間餐廳，以日式風格為主，木製嘅傢私比人一種柔和嘅感。最近，天氣開始轉熱，所以我就揀咗蕎麥冷麵，諗住降下溫之餘，又可以開胃啲。整碟菜色以冷麵為中心，帆立貝、鮮蝦、蟹柳、蘿蔔絲同青瓜絲以配菜形式包圍冷麵，再鋪上紫菜絲，視覺效果唔錯。冷麵偏軟身，冷麵下面有一塊竹蓆同碟，可以直接將醬汁淋上冷麵，就唔怕弄髒；而我就習慣捲起一小束，再沾有小小醬汁先食，冷麵就唔會因爲一次過淋上醬汁而變得過濕。帆立貝同鮮蝦尚算大，亦有適當嘅調味，食落唔會太淡。另外，仲叫多咗一碟小食，照燒Q版魷魚。除咗主菜魷魚之外，仲有大量嘅木魚碎，同醃蘿蔔、小蕃茄做配菜。魷魚雖然比較細，但係都均勻塗抹咗燒汁，照燒味濃，味道偏甜，配合味道較淡嘅木魚碎，相輔相成。