阿來東南亞風味 (已結業)

今日同朋友嚟油麻地呢間阿來東南亞風味食晚飯，餐廳都好乾淨企理，侍應俾咗個卡位我哋，坐得好舒服，可以慢慢吹水慢慢食，睇吓menu都唔少選擇。星馬蛋黃雞翼$68，炸得好香脆，有陣陣嘅蛋黃味，中意食蛋黃嘅朋友不妨一試。馬拉盞炒通菜$58，炒得好靚，馬拉盞味好香好濃，呢個值得推薦。香茅鹽燒鰂魚$138，外脆內軟，入面啲肉一啲都唔乾，好滑，配埋個泰式醬汁好惹味！我本身好中意食魚，我自己一個都食咗大半條😂咖哩軟殻蟹火山包$138，個咖哩只係有少少辣，甜比較多，有蛋喺入面，用嚟送包就真係好夾。切開咗就係咁樣，啲軟殻蟹都比想像中多，好香口。總括嚟講，呢間餐廳環境潔淨，侍應好有禮貌，價錢親民，味道唔錯，好啱同朋友嚟聚餐。