一寿司 (已結業)

琴日收咗工後，返到屋企附近，就打算同家人一齊响屯門市廣場食晚餐。無意之中發現黑夜壽司提早6點就有半價，仲記得之前要等到10點幾先有。細看之下，原來呢個優惠原來係星期一至四先有，既然一場嚟到又有半價咁抵，就決定選址一壽司。雖然排咗一陣，但一家人食得好開心，上菜速度算快，而款式又算多。其實真係幾抵食，除咗熟食之外，就連飲品都有半價，每次必點係三文魚壽司，肥美細嫩，夾起時，飯亦唔會散到一舊舊，以半價嚟講可以話質素唔錯。軍艦就點咗海膽同三文魚子，其中三文魚子有驚喜，咬落去鮮香滿溢，完全無遺留腥味，而海膽新鮮度亦尚可。原本一客3塊嘅吞拿魚腩，誠惠$160，以呢個價錢平時就唔捨得食啦，不過半價咗就點嚟食下。吞拿魚腩非常肥美，感受到入口即溶嘅感覺，果然貴有貴著，超好味呢。原條鰻魚壽司，蒲燒醬汁非常濃郁惹味，咬落油香肥美，推介推介!雖然小食無半價，但都點咗幾串串燒暖暖胃。串燒款色選擇多，有雞肉串、多春魚、冬菇、就連比較少見嘅煙肉車厘茄也有。不過我就比較鍾意洋蔥牛柳，牛柳軟腍腍，醬汁多，同洋蔥一齊食係絕配呀。整體質感唔錯，搵日再嚟過Encore先。