陶源酒家 (已結業)

上年曾經嚟依度飲早茶,雖然話早茶,果陣時10點先至開門,應該係無早茶優惠,基本上唔使等位,因為全間酒樓一半都坐唔滿.而且當時燈光昏暗,飲早茶果陣已經未醒晒,加上令人昏睡既燈光,真係會令人訓著.可能茶樓終於諗通咗,真正開放早茶時段,即係再開早啲,俾埋早茶優惠,燈光調返光.不過好似都做唔起,或者因為太早,始終都係只有幾枱客,同無早茶果陣差不多咁多客人.糯米飯雖然係應該軟糯,但實在太濕立立,而且冧得滯.炸兩加得極少豉油,油炸鬼仲係脆卜卜既,但腸粉皮冧到削.咸魚肉餅飯太少咸魚,可以當一般肉餅餅食,但肉餅太冧,似乎因為成份多粉少肉.本身可能無醃味,要加豉油先有味.蝦餃細粒但係裡面既蝦好大隻,而且仲好爽口.叉燒酥炸得好靚,裡面汁多,聞到香味,甜甜地幾好味.線花雞都幾大碟,雞好大舊,都幾滑而且吸到味.,舖係底既南瓜好多,令到成碟南瓜味好重.唔記得乜名既點心,純粹噱頭野,實質應該係蘿蔔絲酥餅插上一條扭成鵝頸形狀既餅乾.一上枱既時候好似訓泥頸咁,經過一番調校之後見得下人,但係蘿蔔絲酥餅已經凍晒唔好食.