薈亞廚房 (已結業)

今日同阿哥撐枱腳，佢話開學請我食飯，咁就去附近商場食啦。我見都幾耐無食泰國嘢啦，於是就揀咗呢間。由於我地得兩個人，叫咗三樣嘢食，包括泰式炒金邊粉，海南雞，泰式四拼盤。泰式炒金邊粉：呢個同我係泰國食嘅樣同味都差唔多，有塊薄薄嘅格仔蛋皮鋪係面，味道酸酸甜甜，配料有好多蝦仁，鹹淡適中，口感都幾好，賣相幾靚。泰式四拼盤：有無骨酸辣鳳爪，炸蝦餅，串燒，泰式春卷。我自己好中意呢個小食拼盤，因為通常小食拼盤總會有一樣唔啱食，不過難得呢個我樣樣都啱食，特別中意食鳳爪，酸酸辣辣嘅感覺好適合夏天。炸蝦餅都幾彈牙，唔會覺得厚粉。泰式春卷味道都幾好，搭配咖喱汁和泰式甜辣汁食，幾惹味。海南雞：雞肉幾嫩滑，醬汁都好食，分量好多，我地兩個人食唔完，最後仲打包攞返屋企夜晚再食。