正 麻辣·茶·雲吞 (已結業)

小妹雖然唔係幾食得辣，但就一向鍾意麻辣嘅麻香。今日去屋企附近依間小店，佢坐位唔多，鋪頭一眼望哂，但都幾多人走去食。見到門口有張貼雜誌報導，標榜冇味精，所以就嚟試一試。先嚟嘅係涼菜。涼伴雲耳$15有一碟。夠味得嚟有少少辣。糖心雞蛋$9有兩隻，雖然佢睇落似係老咗，但其實入面仲有流心，有少少入口即化嘅感覺，夠滑，幾好食。既然標榜冇味精就要試下個湯餃。揀咗唔辣嘅香濃豬骨湯底，香菇素雲吞$28/7隻。價錢幾實惠。有別與一般嘅雲吞，佢個皮較為晶瑩剔透，見到入面橙橙地色嘅蘿蔔絲顏色好靚，入面仲有香菇同椰菜。雖然係素菇，但佢都唔係淡口的。配埋個湯一齊食好舒服，食完真係冇覺得口乾。另一款韭菜豬肉雲吞就因為有韭菜喺入面，就比較出味d，咬落韭菜嘅份量算好多，而且唔會好油膩。麻醬青瓜雞絲冷麵，冷麵青瓜同雞絲以一層層放好，上面淋咗麻醬。個冷麵有少少乾身，但撈埋個麻醬食就都ok. 雞絲分量好多，多到有d食唔完😂最後以一杯羅漢果靈芝茶作結。雖然有靈芝但唔會好苦，感覺真材實料。