鐵板先生 (已結業)

星期一永遠都係無心機返工，為左有動力返工，book左鐵板先生同朋友收工一齊黎開心下。第一次食呢種有廚師喺你面前即整嘅鐵板燒，感覺好興奮！頭盤先黎我最愛嘅面豉湯同蟹柳沙律，無法抗拒嘅蟹柳搭配酸甜的沙律酱非常清新又開胃~一個好嘅開始！夏天最喜歡食翠玉瓜，口感爽脆清甜多汁。小妹對蠔麻麻地，朋友又咁鍾意，所以俾埋佢食刺身有帶子同三文魚，如果帶子大粒D就好喇。炒飯味道淡左少少，自己加左鹽好味好多，炒得好乾身唔油膩。見隔離枱有人生日，廚師用炒飯整左個蠟筆小新俾佢，仲用雞蛋寫左生日快樂，好厲害 龍蝦配多士有驚喜，廚師用鑊剷將舊肉起左出黎，再加上咸蛋黃醬，點多士食一流。肥牛卷入面包住露荀，肥牛唔韌，味道OK最後係鵝肝多士，煎到金黃色嘅厚切鵝肝超邪惡，加上多士一齊食超脆口！成餐飯最好味係龍蝦配多士，次次食親龍蝦都覺得無咩味，但今次配上咸蛋黃真係好好味！