強記大牌檔 (已結業)

同朋友行完街，叫埋自已另一半食晚飯。一直都鐘意食大排檔d小菜，貪佢夠鑊氣同新鮮即炒。今次仲有朋友介紹，應該有咁上下水準。朋友一坐低即叫羊腩煲，大大煲羊腩同羊骨，白菜支竹亦不少，味道當然不及桃花源，但以幾十蚊的價錢，絶對食得喎。見其他台食串燒，唔抵得都要叫番幾串，見佢真係用炭燒，所以上台時好有炭燒味，用來送啤酒應該一流，串燒羊肉講味道同肉質，一定係好過小肥羊，雞軟骨都唔差，而豬頸肉則較肥。另外叫了個128蚊套餐三餸一湯四白飯，非常之抵。小菜其中一樣當然係生炒骨喇，又熱又脆口，甜酸道適中，而件件骨都大細相約；炒魚肚，同雞蛋芽菜一齊炒，雞蛋炒得唔老，真係食到鑊氣味，可惜魚肚較少。芥蘭炒腊品，朋友好鐘意食佢o地腊腸腊肉，芥蘭幾嫰可借炒得略淋。雖然地方坐街邊，但好食就唔會介意，下次再同多d朋友o黎，試多幾味小菜。