塩玉居酒屋 (已結業)

經過銅鑼灣，突然想食日本菜，之前聽朋友有介紹過呢間居酒屋，上到去個格局都好和風，座位都闊幾舒服，睇完Menu試左一個Set D。頭盤係甘酢車厘子，凍凍地，酸酸甜甜，幾開胃。第二道係黑松露白身魚薄切，白身魚幾新鮮，而黑松露味夠濃，點少少碟邊一早預備的食鹽，個味已經好出。之後第三道就係海膽控的至愛－海膽丼。本身海膽已經幾新鮮，入口即溶，配合淡雪鹽，淡淡的咸香帶出海膽的鮮味。第四道係酒盜芝士，本人第一次食，問左店員咩係「酒盜」，原來是用海參腸、魚內臟，加鹽腌漬半年以上而成。本身酒盜係幾咸，但同埋芝士粒一齊食估唔到又幾夾。第五道就係燒大蝦, 大大隻，肉厚，有咬口，肉味都鮮甜，火喉控制唔錯，肉質唔會老。第六道係豚肉稻庭烏冬，烏冬夠滑，但最驚喜竟然係個湯底，夠曬清甜。第七道係一壺海鮮湯，材料見到有蝦、金菇、魚，味道不錯。最後飯後甜品係雪糕一客，有豆腐味同柚子味，試左豆腐味，個豆味幾濃，又唔太甜，幾易入口。