老鍋台式火鍋 (京都廣場) (已結業)

午間興起突然間好想打下邊爐，醒起之前見到呢間台式養生火鍋睇落好吸引，於是就同朋友嚟烚下烚下。呢間火鍋店位置方便，地鐵站5分鐘內既路程就到啦。最近店家推出半價限時既午市套餐，有打邊爐或者唔同湯底既米線揀，我就同朋友揀咗2人火鍋嚐味套餐，淺嗜台式火鍋既水準。套餐既份量適中，對2位女士嚟講啱啱好唔會太飽。由於友人係酸味控，湯底我地叫左老饕酸菜白肉鍋，呢個湯底惹味又開胃，同埋入面除左酸菜仲搭配咗不同既新鮮蔬菜、蕃茄，口感更豐富而且味道更鮮。另外值得一提既係呢個湯底配寬粉真係好正，粉條索曬湯既味道好入味同時佢又煙煙韌韌，會令人食到唔停口。牛肉片賣相吸引，佢唔單只砌得靚靚每卷牛肉都好精緻，肉質唔會太肥成塊肉都係肥膏。牛肉唔太肥除咗健康啲同唔會太膩之外，佢亦唔會烚完搞到湯底油淋淋影響其他食物。其他餸方面套餐入面仲包含有一個蔬菜盤、4款肉丸及魚皮餃同一個米線麵底，對於想過下打邊爐癮既人嚟講好足夠。而且打邊爐除咗食之外，最緊要係烚下烚下果陣朋友間吹吓水傾吓偈，店舖內座位寬敞舒適，好適合閨蜜小聚閒聊。