忠記咖啡屋‧私房菜 (已結業)

今日打完波搵野食比我發現呢間位於銅鑼灣嘅忠記，啱啱新開當然要試一試。入面環境同一般茶餐廳無異。餐廳有例湯送。第一道小食好快上菜，就係稻庭烏冬配北海道帶子。帶子外皮稍為煎香，內裏依然晶瑩剔透，處於魚生嘅狀態，非常鮮嫩。另外醬汁係芥末芝麻，有少少辣，更突出到庭烏冬嘅幼滑細膩嘅口感。芥末蒜泥牛脷非常軟稔，配上蒜泥味道非常夾。一碟起碼10塊牛脷但價錢只係$46，我覺得非常抵食，下次嚟一定encore。另外一道小食係椒鹽黃金豆腐，外層香脆內𥚃豆腐依然嫩滑，每一粒既size都差唔多，唔會一粒大一粒細，抵讚!以上三款都係小食，我哋當然食唔飽，所以叫咗沙窩雲吞雞，分量超大。湯底非常鮮甜唔油膩，可以當湯咁飲。雲吞係人手製成，皮薄餡靚。至於雞仍然嫩滑，肉質一啲都唔「鞋」，可謂色香味俱全。最後叫咗杯凍檸茶，非常大杯，茶底亦不錯。估唔到喺銅鑼灣商業大廈上面有一間幾抵食嘅中餐廳。食物價錢係銅鑼灣算合理，二人餐都係$308，四人餐就$688。下次多啲人打波之後可以一齊食呢間，試一試佢其他菜式！