Ember (已結業)

好多人成日都話銅鑼灣後花園喺大坑，我覺得係告士打道望海景一帶才是真正嘅後花園。呢到租金相對便宜一點，出奇地全部租金比起銅鑼灣核心一帶平好多。之前餐廳酒吧都會平一大截，我個朋友推介我哋呢度happy hour非常之抵，本身諗住過嚟同班friend傾吓計就算。點知佢嘅小食好平之餘，仲被我發現咗佢嘅set dinner一樣咁抵。湯有四個揀，有海鮮湯龍蝦湯忌廉湯同凍湯，我選了牛肝菌忌廉湯，質素算幾好。前菜好多海鮮揀，最後我揀咗令我非常滿足嘅法國鵝肝。煎得幾香加上焦糖蘋果同雜莓黑醋嘅配搭，非常好食。主菜嘅選擇非常多，由意大利粉到意大利飯，再有豬雞魚羊各種唔同嘅菜式，你完全想像唔到一間咁小嘅酒吧可以有咁多元化嘅嘢食，最出色係連豬「不見天」都有得食。不過我最後選咗最簡單嘅肉眼扒，價錢唔算貴又幾好食，扒嘅質素都幾好。最重要係喺銅鑼灣呢個咁熱鬧市區，佢有酒飲有咁多嘢食都係每人二百幾蚊。加埋個甜品，講真，如果我係男仔，約女食飯一定揀呢啲餐廳。場內都幾有氣氛，好多朋友四個女仔一枱，下次都可以咁樣選擇。