岩鹽日本料理 (利舞臺廣場) (已結業)

今日去灣仔買野之前就去銅鑼灣食午餐，之前試過呢間餐廳唔錯，所以就約埋朋友再去食。今次我就試新野，就係牛肉火鍋定食配刺身，牛肉份量雖然比較少，但好重牛味，但湯汁就比較偏甜，係日式壽喜燒鍋嘅風味。鍋裏面除咗牛肉，仲有其他配料，包括豆腐，芋絲，冬菇，菜，同埋大蔥。跟餐仲有蒸蛋，沙律同埋刺身。刺身有甜蝦、帶子同埋三文魚各一件，非常鮮甜，好好味。另外朋友就叫咗黑豚生薑燒定食，黑豚扒肉質鬆軟，配上生姜燒汁，非常惹味，配上椰菜絲沙律，感覺就冇咁油膩，食落好清新。而另一個朋友就叫咗鹽燒鯖魚定食，鯖魚燒到外脆內軟，唔會好乾，魚都幾大條，份量唔少。另外，每個餐除咗可以選配飲品之外，亦可選配Häagen-Dazs雪糕。午餐嘅價錢大概都係100至200蚊左右，性價比係非常之高，因為定食好豐富，好抵食，而且味道亦唔錯，係銅鑼灣午餐嘅好選擇。