金金日式燒肉店

营业中

休息中

呢晚去銅鑼灣行街買野，去咗渣甸坊附近嘅日式燒肉店食飯。位置好方便，啱晒行完街過來食飯。餐廳裝飾好日式，座位好寬敞，餐牌入面好多選擇，仲有日本產和牛供應。因為已經係宵夜時段，唔係太高戰鬥力，我哋單點咗幾款食物，再加埋一個宵夜時段嘅半價小食。壼漬牛肋骨肉28cm ($138) - 打卡一流，淨係賣相已經夠吸晴，先將整條牛肋骨肉浸入醬汁，再放落去燒。入口勁juicy，肉味香濃。澳洲M9和牛柳（$168）- 餐牌上呢個新品價錢好吸引，和牛肉質好鮮嫩，牛味出色。鹽燒牛舌（$88）- 分量唔少，牛舌入口好煙韌，有咬口，抵食之選。日本甜番薯（$48）- 甜番薯連蒜蓉牛油上，燒一陣，番薯好甜，配埋有蒜蓉牛油香，好味呀。日式厚切豆腐燒（宵夜時段半價：$29）- 上餐已經燒得熱辣辣嘅豆腐，質地有少少似臭豆腐。如果想再香脆啲，可以自己再燒多一陣，點埋辣醬，好惹味。餐廳抽風做得好好，唔會話油煙好勁，食得舒服，食物質素唔錯。星期一至四仲不限用餐時間，啱哂同朋友一齊食飯傾偈。