小欖燒烤樂園 (已結業)

如題。今日黎呢度BBQ，我地一行9人，只係要左一個爐，因為每個爐開爐費要30蚊，唔知點解要俾，我黎燒野食，你緊係要俾爐我啦，遲D可能酒樓都會學呢招，打邊爐要收「開爐費」。野食係OK的，基本上應有盡有，但係無D較好既食材，例如蝦或者魚，我上次去西鐵樂園就有。不過環境真係好唔掂，首先係逼，我唔明點解D爐可以咁近，爐與爐之間真係伸隻手過去都燒到，所以坐得好唔舒服。另外放低野既空間亦好少，得一張枱仔，我地放低D袋已經無位放食物。我仲見到有一部分位置竟然有帆布蓋頂，我覺得同燒炭自殺無咩分別，D熱氣全部聚埋一齊。最厲害係見到好多人打牌，真係能屈能伸既表現。其次係走廊完全無位行，因為實在D爐太近，所以大家都自動散開，佔據左走廊既地方，結果當然係走廊形同虛設，要出入極度困難。再者係果度地方都算大，我地編左去一個好遠既地方，每次攞野食要行好遠，大大減低去攞既意欲，當然係食得好不爽。最後一句，我覺得賺錢唔係一定要賺盡，好似佢咁好生意，我就唔會有下次，仲會上黎寫食評，希望大家去之前可以考慮清楚，實在有好多好多比佢好既選擇。仲有一樣，我地人頭費係108位，真係史上最貴。