德國餐廳 (翠怡花園) (已搬遷) 新店位置

因為疫情都有年幾冇去過旅行，呢日同朋友嚟到大埔呢間德國餐廳，諗住食吓德國菜，重拾下係德國旅行嘅回憶。為咗防止病毒傳播，呢度係用電子菜牌落單，一嚟夠環保，二嚟乾淨衞生。一打開餐牌果然有好多款有德國特色嘅食物，例如有香腸拼盤呀豬手咁。我地兩個人就嗌咗份鹹豬手。等候時間唔係好長，10分鐘左右豬手就上桌，果然好大份！餐廳已經好貼心幫我地切好哂，豬手啖啖肉，而且鹹香味十足，外皮都好酥脆。豬手沾一沾黃芥末味道會更突出添！另外佢伴碟嘅沙律同酸菜亦都好好味，一碟嘢夠哂滿足兩個人嘅胃口。諗起德國，唔少得就係啤酒，呢度嘅選擇好多，我地見做緊promo有枝朱古力黑啤，於是一人嗌咗枝嚟飲，一飲果然朱古力味好重，雖然係黑啤但女仔都會鍾意。呢晚簡簡單單肉加酒就一解無得去旅行就憂愁。